| بو سليمان: ها أعلنوه؟
بو حمد: شنو بعد شعلنوا
بو سليمان: حل المجلس ما تدري راح يعلن الساعة 6·
بو مطلق: أفا حل المجلس؟ هذي نهايتها·· الله يانه طراق كبير وليش كذه، ما عندهم تقدير للشعب؟
بو جاسم: إي والله وانت الصادق ماكو تقدير للشعب ما هو بطراق إلا إنه بوكس قوي، كفخة على الراس·
بو علي: يا جماعة الحين مو قالوا إن الخمسة وعشرين انسوها·· شلون تذكروها شلون رجعونا على الخمسة وعشرين·
بو سليمان: هم يقصدون إحنا ننساها لكن هم ما ينسونها·
بو علي: يعني قصدك ما يبون إلا الخمسة وعشرين ليش عاد متشبثين فيها؟!
بو سليمان: ياه بو علي تسوي نفسك ما تعرف؟ يعني ما تدري لانه بدون الخمسة والعشرين ما يضمنون ربعهم، يضيعون بالخمس أو حتى بالعشر· هذا اللي يقوله زعيم "الثلاثي" للجهات المتقدمة·
بو علي: وعاد هم يصدقونه واللا هو يسوي اللي يبونه· ما تقولي يعني منهم ربعهم مهو حنه؟ والا إحنا مو في وارد الحساب·
بو سليمان: أنا إيش عرفني يصدقونك وإلا يسوون اللي يبونه أنا قاعد معاهم؟
بو علي: انزين منو ربعهم؟
بو سليمان: بو علي انت الله يسامحك كانك اتهيبل، يعني من صجك تسأل منهو ربعهم، يعني معقولة يا بو علي، معقولة واحد مفتح باللبن مثلك ما يعرف منو ربعهم؟ شنو هاالأسئلة لكن مع ذلك أجاوبك·
أولا أنت وجماعتك والشباب البرتقالي اللي فجروا الحركة الشعبية والنواب الإصلاحيين ما أنتو ربعهم يعني الشعب الكويتي ما يحسبونه ربعهم، ربعهم اللي دفعوا رشوة واشتروا كراسي مجلس الأمة بفلوس أول كانوا اثنين، ثلاثة الحين صاروا 12 أو أكثر لا وبعد أزيدك من الشعر بيت··· التمويل حق اللي ما عنده من كيس الدولة واللي صرف من جيبه يعطونه مقاولة ولا مشروع، وإذا المقاولة راسية عليه بعشرين مليون تصير بخمسين مع الأوامر التغييرية طبعا يعني شوية تعويض·
بو علي: أوقف·· أوقف انزين اعتبرني اتهيبل وماني فاهم· بالله ما تشرح لي اشلون·· مو جت الجهات العليا ورفعونا بخطاب ذاك المديح والثناء عندما وقفنا أيام أزمة انتقال السلطة وصرنا شعب حضاري وعبرنا الأزمة بالرجوع للدستور، والحين تقولي انتو، هالناس كلها ماهم من ربعهم، يعني هذا جزا الوفا والوقفة اللي لولاها كان صراع الأجنحة قومة وقعدة·
بو سليمان: والله عاد أنا أقول لك شنهو اللي صار عاد أنت فسر على كيفك بعد لا تورطني مع الشيوخ أنا بصراحة أخاف، لا تبلشني·· لا تبلشني·
بو علي: أبي أبلشك ولاني مخليك وانزين فسر لي هذا اللي قال أخذوها مني انتخابات 2007 راح تصير على أساس عشر دوائر وين كلامه؟!
بو سليمان: أنت بو علي والله بلشة يعني لازم تفتح أبواب مقفلة، الرجال قالها، وقال كلام وايد غيرها قال للنواب وتعهد أن الراي اللي تجيبه اللجنة اللي تدرس الدوائر، يعني لجنة خالد العيسى والروضان، الحكومة راح تاخذ فيه لكن يمكن نسي أو ما طلع بيده أو جاءته الأوامر من فوق، اشدرانا إحنا نعلم الغيب، بعد الرجال غايب عذره معاه·
بو جاسم: "اللي قفز من مكانك كأنه قارصته عقرب" من فضلك اسمح لي شنو هالحجي شها الكلام اللي ما يدخل العقل، هذا كلام واحد بهالمركز تقولي نسي ولا مهو بأمره ولا·· ولا شنو هالحكي هذا اللي ما يدخل العقل كلام ينقال من أعلى مستوى وبقدرة قادر ينلحس بهذه السهولة·
بو سليمان: والله عاد أنا أقولك شنهو اللي صار هذا الكلام ينقلونه أهل العلم·· يبة أنا ما قلت كلام كفر·· لا تبلشني·
بو مطلق: يا جماعة الخير الحين وراكم ما غير تلومون الشيوخ وربعكم الوزراء الشعبيين وينهم؟ هم قواطي والا وزراء؟ يعني هذوله أعضاء مجلس وزراء وإلا ربع قنص، يعني ما فيهم واحد فيه بركة يتجرأ ويقولوا هاللي قاعد يصير غلط وينبهم أنه مو في مصلحة البلد ولا هو في مصلحة الشيوخ·
بو علي: يعني أنا اللي مو فاهمه ليش خايفين من تعديل الدوائر الى خمس، ليش ما يبون انتخابات نظيفة، يعني إذا طلع كم عضو نظاف مثل المجالس الأولى شي اللي يضرهم مو أول طلعت مجالس قوية وسارت الأمور على ما يرام مو أحسن للبلد وشيوخها بالله أبي أعرف شنو راح يصير إذا جاء مجلس مثلا·· مثلا فيه 12 واحد زين·
بو سليمان: أهو ردينا على طير ياللي يعني ما تعرف شنو يصير، راح يرفعون أصواتهم ضد الفساد ويضيقون الخناق على هاليبرتون وأخواتها وهذا راح يزعل أحمد ويضايق شرار وينرفز محمد·
بو محمد: بس يبه بسكم عن الحش طايحين في الشيوخ ووزرائهم قرض، يعني توكم عارفين أن هذي ديرة الشيوخ ويسوون اللي يبون زين سامحين لكم تعيشون فيها·· وقالوا لكم اللي مو عاجبه الدروازة مفتوحة ما ردوا أحد بس انتو الكويتيين أصحاب مشاكل قلة يدورون الطلايب، تبون دستور وتبون ديمقراطية وإصلاح ومحاربة فساد، وين قاعدين بسويسرا، مو قالكم الرجال التلفونات ترقع من دول الجوار·
بس·· بس خلونا نلعب كوت والا ترى بسري· |
