مسفر الدوسري

الليله غَنّْ··

أَوْقِظْ عصافير المسا في خاطرك

زيِّنْ قَناديل السما·· وصبَّها

في قاع روحك·· للضحى

دام السهر

للعشب تحت وسادتك الليله·· حَنّْ

الليله غَنّْ!

الليله جا حِزْنك على ما تشتهي

صار له زمان يجاملك

ويسَرِّب لْحَاف الدفا

في داخلك

كل ما الشتا فـ أوتار صبرك إسْتكَنّْ!

غَنّْ··

الليل لَجْلك والمدى··

مفتوح

للبوح

وتراتيل الجروح

أنت ما تِحِسّْ الروح منِّك قطَّرَت··

ندى·· وفن؟!

الليله غَنّْ··

وش ينقصك هذا المسا؟!

الليله

كل شي ما بين ايدينك مستوي

طري:

صوتك··

وَرَقْ تُوتِك··

وجَمْرك··

والصُّور·· اللي تركت··

في ثوب حلم البارحه

وكمْ ساورك في كذْبها من صدقها··

سراب ظنّْ!

الليله غَنّْ··

هذي عناقيد الحكي ما بين ايدينك استوَت

وخَمْرَة معانيها بصمتك عَتِّقَتْ

جَرِّبْ تصبّْ·· المختفي من الصور

في كاس عمْر المنطفي··

من الكلام

جَرِّب تذوق

في ماي صوتك مِن تحبّ

كل ما الحلى في وَصْل من تهواه··

مَنّْ!

الليله غَنّْ

إملا مواويلك شجَنْ

إطْلِق سَراح اللي انسِجَن

في داخلك

من الرِّياح

راح اللي راح،

الليله شِدّْ حبيبتك من إيْدَها

وأرسم لها نهارها

واللي نسَتْ من عيدها

خلّْها تقول بكل فَرَح:

الليله جَنّْ!

ياصاحبي·· الليلة غَنّْ!

 mosfer@taleea.com