مسفر الدوسري

ليش إنك··

تخاف النار·· لاتحرق  مدينتنا··

احترقت··

بفعل النار إيدينك!

لأن عينك··

نجمه  صبح··

راحوا حاصروا عينك!

ليش إنك تحب الأرض

وتزرعها وسط قلبك··

سنابل حب·· للطيبين

زرعوا غربه

بين الأرض وما بينك·

ليش إنك··

نهار يفاجأ الظلمه

وقمره··

ترفض  العتمه

ونبي··

يمسح جروح الناس

بعطر الحب·· والكلمه

صرت كافر··

وكِلْمن يقصدك سهمه!

ليش إنك··

صرت شراع··

ماهادن

ولا عمره انحنى للريح

صار الدرب

حتى الدرب

يخذل فرحه الخطوه

ويحاول يبيك اتطيح!

بس شلون؟!

وإنت الدرب ··والخطوه

وإنت الشوق ·· والغنوه

وإنت اللي··

عطيت أحلامنا القوه

لكل عاشق

حرقت عمرك

في ليله شتا "دوّه"

إنت عيون محبتنا

وإنت الدرب والخطوه

 mosfer@taleea.com