أعزائي القراء لقاء اليوم مع شخصية زئبقية لا تنقصها الصراحة لها من المواقف الكثير، لكن كلها مواقف على ورق تعالوا نتعرف على ضيفنا وضيفكم:
س: البطاقة الشخصية؟
ج: الاسم دايم،الوظيفه رئيس برتبة عميد، العمر أخاف من الحسد·
س: كل الناس تترقى إلا إنت كل هالعمر و لألحين عميد؟
ج: توني مترقي بس دايماً أرجع حق رتبتي علشان لا تروح علي·
س: شلون يعني ممكن تشرح لنا وللسادة القراء؟
ج: يعني علشان أترقى أروح وأشيل لواء المعارضة وإلا المصالحة وأصير لواء وبعدين أرجع عميد وهلم جرا·
س: يعني جمبزة؟
ج: لا يبه هذي يسمونها فلسفة·
س: بعد فيلسوف؟
ج: طبعاً شيبيلها قول كلام وايد كبير ما تقدر تسويه واقعد نظّر في المقابلات والندوات وتصير الفيلسوف إفلاطون· علشان جذي حطوني رئيس اللجنة؟
س: أي لجنة؟
ج: لجنة التعديل والتنقيح·
س: ممكن نعرف الثمن؟
ج: لما صارت الصجية لحست كلامي وخونت بأخوي وربعي و قلبت·
س: بس هذا الموضوع راح يسوي مشاكل كبيرة؟
ج: مو مهم المشاكل أهم شي لقاءنا مع إقليم التفاح ماشية·
س: إذا وقف النشاط ممكن يلغى اللقاء؟
ج: إذا ألغوه أييب لهم أخو رونالدينهو وأسوي له مؤتمر صحفي·
س: ومنو ينظم المؤتمر؟
ج: أي واحد وإلا وحدة من عيالي بالمؤسسة·
س: شنو المؤسسة حق العائلة؟
ج: لأ بس إحنا متطوعين وودنا نخدم المؤسسة علشان جذي ولدي معاي في الإدارة وولد أخوي ماسك الفريق وبنتي على الحريم وكله تطوع وحياتك·
س: يعني ممكن أي واحد يتطوع؟
ج: لا شنو أهو سبيل التطوع له شروط·
س: ممكن نعرف الشروط؟
ج: 1- أن تكون من العائلة ·
2- تقبل إنك مو إلا تكون على طول رئيس يعني تبدي بعضو بعدين تصير رئيس وإلا نائب رئيس لا تخاف أنا صرت عقب أخوي العود·
3- تسمع الكلام وما تصير مثل أخوي الصغير راسك يابس وتحط راسك بروس عيال عمي ·
4- تعلن إنك متطوع مثل باقي أفرد العايلة وتعاير الناس بهالتطوع وإنت طل لا تطوع ولا شيء·