مسفر الدوسري
تجي نسمه··
تجي ريح··
لاتوقِّف يوم تجنيح القصايد
لاتريح وتستريح·
---------
كل يوم اكتب قصيده·
كل صباح ··
ابتدي باسم الشعر
وافتتح يومك·· ولوّنْ·
بَعْثِر اللي قبل هاللحظه امْتكوّن!
عيد ترتيبه·· وهَوِّنْ!
كل صباح··
عِدّْ حبات الندى
سابق أسْرَاب الفَراش
صافِح أحزان الشوارع
دوِّر اللي فيك··ضايع·
كل صباح··
اعشق أكثر من حبيبه
اصْدِق··وعاهد··وخَوِّنْ!
عِيْش إحساسك··
وكَوِّن··
كل يوم عالم··
على أنقاض العَالم اللي البارحه··
كان·· "الصحيح"!
لاتوقِّفْ يوم تجنيح القصايد
لاتريح وتستريح·
---------
كل يوم فيك شاعر ينولد
وتنولد في دهشة عيونك ·· عيون!
ليش تخوْن؟!
ليش تنحاز لـ··(رصاصه)··
ضدّْ··(طير)؟!
ليش تنحاز لـ··(ظلام)··
ضد··(صباح الخير)؟!
ليش تنحاز لـ(مستنقع عقل)··
ضد·· (شلال الجنون)؟!
و·· ليش تنحاز للي:
هم ماماتوا لموتك··
لا·· ولاهم يحزنون؟!
ليش تخوْن؟!
القصايد··
حريَّة أنفاسك البيضا ونبضك
ليش صَدرك··
يكبر أسوار وسجون؟!
ليش تخوْن؟!
ليش تكون··
القاتل إنتَ·· والضحيَّه
وتبْني في صدرك·· ضَريْح؟!
خلّ تجي·· مثل ماهيّ بْتجي
تجي نسمه··
تجي ريح··
لاتوَقِّف لحظه تجنيح القصايد
لاتريح·· وتستريح·
mosfer@taleea.com