مسفر الدوسري

آنا بخير!

طَمّني يا "تيسير"

وشْلُون احوالك

قلّلي عساك بخير

مَدْري إذا تسْأَل··

عن حالي ولاّ لا

لكني·· آنا·· بخير!

* * *

الشمس مخنوقة

وباقي النجوم سودا

والعَتْمَه تملى الروح

وآمالنا تمْسي

تصبح تصير جْرُوح

 ولابقى بالقلب

حالي ولا مملوح

والخطوه محتاره

ماتدري وين تْروح··

واصواتنا خَرْسا

نموت قبل ما نبوح

ولو بحْنا وش بيصير؟!

لكن أخوك بخير!

* * *

بعْض الظنون آثام··

وبعض الرّجا أَوهام

وتشَابَهَت فينا

الفرحه والآلام

لكن أظن الجاي

من عُمْرنا مسروق

ومن نومنا مسروق··

الغفوه والاحلام!

تحت الوسايد دم··

فوق الوسايد هَمّ

وطير الفجر لاهدّ··

ولاّ بسمانا حام

منتوف فيه الريش

وشلون تبيْه يْطير؟!

لكن أخوك بخير

* * *

"تيسير" في قلبي

يتعذّب السؤال

خايف على الأطفال

ماأدري لو يلقون باكر

بقايا ماي

في قلب هالصحرا

وِلاّ قَدَرْهم بس

مِنّا العطش والّلال؟!

ماأدري يا "تيسير"

بيلقون لهم كرّاس؟!

وشمس ودفا وظلال؟!

بيلقون لهم أحلام خضرا ··وفضا ··

وموَّال؟!

يوم يكبرون باكر

بتْتعَدّل الأحوال؟!

ويتعَدّل اللي في··

 حاضِرْنا هذا مال؟!

خايف على الأطفال

أطفالي واطفالك

من هالزّمان الصَّعْب

وفيه الليالي طْوال

ماتبَشِّر بتغيير!

لكن أخوك بخير

أنا اموت بخير!