مسفر الدوسري

إنتي أجمل ماحصللي العام

والعام اللي قَبْله

واللي قَبْله

واللي قبَْله

إنتي أجمل ماحصل في عمري كله

وإنتي أجمل من نثر في عيني نوره

وانتشَتْ روحي في ظله

واجمل أجمل من خذا قلبي معاه

وصرتي في صدري مَحَلّه

فالسنه هذي اللي راحت··

إنتي أحلى ماكتبت

وإنتي أروع ماقريت

وإنتي أَوْرَق ماحلمت

وإنتي أشرق مارأيت

وإنتي أروى ماعطشت

وإنتي أعطش مارويت

وإنتي أخطائي الصغيره

وإنتي أخطائي الكبيره

وإنتي اللي كنت بحزن

لو عَقَلْت وماخطيت!!

فالسنه هذي اللي راحت··

ماملا روحي سلام

غيرك إنتي

وما ملا صدري حمام

غيرك إنتي

وما مسح عني الظلام

ولا لوّن··

 فوق شفايف صمتي المرّ الكلام··

غيرك إنتي

ولا خَلّى الصبح يملى كفي الظلما·· غرام

غيرك إنتي

فالسنه هذي اللي راحت

إنتي أجمل ماحصل

وإنتي أعذب من وصَل··

للقلب

من ماي الغمام·

كل عام وإنتي بخير··

كل عام وإنتي الحبيبه

وأنا فيك المستهام!

mosfer@taleea.com