|
|
|
|
مسفر الدوسري
السوالف ما انتهت
السوالف راح تطول
طول هذا الليل كله
طول ما هالصبح غايب
والشقا يشرق محلّه
طول ما الذنْب الكبير
يصير·· صغير···
ومن وقاحتنا نقول
الذّنْب ····"زلّه"!!
طول ما فيه بيننا
إنسان مقهور وحقوقه
ضايعه ما بين·· يمكن،
أو·· لعلّه!
طول ما الناس الفقيره
تلبس اثياب العفاف
وتاكل الصبر ·· وتخاف
والذيابه مسفهلّه·
السوالف راح تطول
طول ما الورده يحاصرها القحط
واحنا تايهين باللغَط
مانسمي أي شي باسمه
ونترك ··
جوهر الضيم وننظّر ··
حول ظله·
طول ما النور البهي
ممتلي حزن وظلام
و النجوم ماساعفتنا
وانخذلنا بالأهله!
راح نقول
وراح نسولف
طول ماهو الحق باين
واحنا بالظلمه نشوفه
بس ما نقدر ندلّه!
القتيل مابين ايدينا
وقاتله·· منا وفينا··
بس مانقدر ندينه
رغم عن أنف ا لأدله!
هم يبون إن احنا نسكت
والحرام احنا نحلّه
للأسف ما راح نسكت
بنتكلم ·· وبنقول
طول ماهذا الوطن
يشتكي مُرّ الجروح
وفيه علّه!!
mosfer@taleea.com |
|
طباعة |
|
|
|
