مسفر الدوسري
يُبَه شْلونك؟!
عَسَاك طيّْب؟!
عساه أَخْضر عليك قَبْرك؟!
يا أَكْبَر مِن رَأَت عيني··
عسى قَبْرِك رَحَمْ كُبْرِكْ؟!
يُبَه شْلُونك؟!
شْلون "الرُّوماتِزِم" ويَّاك؟!
كِنْت تْسِبّه في دنياك
كنت تقول:
"يبيني هاللعين أَبْرِكْ"
تطِقّ رجلينك بْقوَّه
تعِضّْ·· الطَّرَفْ مِن شفِّتِكْ··
وتقول: "لا والله··
في زُود الشِّقا جَبْرِك"!!
يا ألله··!!
تَعَبْت كْثير في هالدنيا
وصُبَرْت كْثير··
عسى الله عوّضَكْ صَبْرِك؟!
يُبَه شْلونك؟!
عَسَاك بْخير؟!
ياللي كِنْت مِتْأَكِّدْ··
إن باكر··
بيجي في يوم مِتْزَيِّنْ!
وياللي كِنْت··
قاسي حيل واحْنَيَّن··
وكان دايم
ورا جَمْر الغَضَب مِنَّكْ
مطر بقْليبك امْبَيَّنْ··
وكِنّا نَدْري ذاك الوقت··
حِمْلِك صَعْب
صَعْب وايد
وما كان ظَهْرِك الّليَن
يومياً··
كِنْت تِصْحّى فَجْر الله··
تاكل بالعَجَلْ لقمه··
تشْرب شاي··
تروح طالع··
وتظلّ تِكْدَح طوال اليوم··
وبالآخر··
ترِدّ فـ العاده مِتْدَيّنْ!!
حِمْلِك كان صَعْب وايد
عساه بْقَبْرك الْهَيّن؟!
عسى بْقَبْرك·· صارت أحسن الأحوال؟!
وعسى قَبْرك عليك واسع؟!
كنت دايم تشكي من:
ضيْق الحال··
وضيْق الفَال··
وضيْق البيت··
وضيْق الشَّارع اللي يوَدّي لْبيتنا··
والبال!
وكِنْت تْسُولف بْغَصّه
عن اللي يعْتِصِر هالنّاس
من ضيم وتَعَب·· وأطفال
وكنت تقول:
"دام أن السُّوالف مُرَّه مِثْل الهيْل··
ليش ماتسْتوي بـ "دلال"؟!
ليش ما "نِجْرَها" مَسْموع - مثل الهيل -
يحَرِّك نَخْوَة الرّجَال؟!"
كِنّا نِمْتلي دَهْشَه
ونِتْفَاجأ مِن السؤال!
وبَعَد ما تْرُوح··
كِنّا نشْرَب الباقي مِن كلْمَاتِك المُرَّه··
واللي كنت تتْركها··
دوم بْقَاعة الفِنجال!
يُبَه مشتاقلك وايد··
يُبَه شلونك··
ليما الْحيْن تِحِبّ السّامري بالحيْل؟
وتْشيله··
وصوتك يمتِزِج بالليل··
ويَضْوي صُوتِك ويَضْوي الحِزِن فيك··
ويصير قنديل؟!
ليما الْحيْن تحِبّ السَّامري بالحيْل؟!
أَتْذَكَّرْ··
كِنْت تْقول وإِنْت تمَوِّل مَعَ اللاّ·· لا··:
"حَمّْ الطَّار"
"عشان صوتك مع اللاَّ·· لا··
يشِدّْ·· ويِسْتِوي مَنديل"
وكنت تقول:
"إخْتَرْ صَفّْ من الصَّفيْن··
شِدّ أيديك بيْديْهم··
تمَثّْلْهُم··
ذَوْب فيهم··
تحِسّْ "باللاّ لا" مِن تطْلَع··
من صِدْق الحَنَاجِر·· سيْل"؟!
يُبَه شْلونك؟!
يُبَه شْلونك؟!
بَعْدِك من يحَمَّي الطَّار؟
يشْعِل فـ الدِّجى اللاّ لا··
ويحِبّ السّامري بالحْيل؟!
mosfer@taleea.com
