|
|
|
|
مسفر الدوسري
طال عمرك
قتلنا الخوف
قتلنا سيفك المعروف
قتلنا طيفك الموصوف
نخاف نحكي
نخاف نقول
نخاف نشكي
والشكوى··
علينا تطول!
صرنا نخاف من الطوفه
قالوا لي: "الطوفه تسمع زين"!!
"وأي كلمه·· ترى تنقال··"
"تصير الكلمه معروفه"
"ترى الطوفه··تسمع زين"!!
قلنا: زين!
طال عمرك
نسينا حقنا عندك
صرخت وقلت:
ماكو داعي للهذره
صدقونا الحلال·· واحد!
وصدقنا··
بس نشوف ··
دوم الزود في جيبك
وادري العيب مو عيبك
كل العيب·· فـ القسمه··
وآنا قسمتي·· عسره
وكل مايامر الوالي ··
أنا ومالي··
تحت امره!
صرنا نخاف طال عمرك
صرنا نخاف·
طال عمرك
حلمت البارحه كنك
عندي فجأه وسط البيت
بغيت الصج؟!
أنا اختضّيت··
سألت بخوف عن حالك
سألت عن صحة عيالك
طال عمرك مدري شفيك؟!
ولا بكلمه علي ردّيت!!
آنا اهنيه·· صرت مفجوع··
قلت أغيّر الموضوع
سألتك ياطويل العمر
ليش عيونك تخوّف؟!
قلت بصوت يهز القاع:
عشان أميّز الزلات
آنا غلطه ما اطوّف
سألتك: ليش·· إيدينك غير؟!
لويت إيدي·· وقلت حقّي:
عشان الخير·· يطول الغير
قلنا: خير!
سألتك : ليش ··
ضروسك زود؟!
قلت: الزود فيه الفود
سألتك: ليش ليلك طال؟!
قلت لي شي ماينقال
عسى ماشر طال عمرك
شنهو مغيّر الأحوال
واشحقه جذيه زعلان؟!
شاللي مزعّل السلطان؟!
خفت اسأل
صرنا نخاف طال عمرك
صرنا نخاف·
طال عمرك··
أمس عْيالي سأْلوني
قالوا لي:
منهو الوالي يابابا؟!
قلت الوالي ياعيالي
أهو·· أبوكم
وأهو·· أمكم
وأهو لو دارت الدنيا
بكل الحب أهو يلمّكم!
وخفت أزيد
اخاف اغلط
واضيع آنا طال عمرك
ويضيع من بعدي اعيالي
وكل هذا يصير بأمرك
صرنا نخاف طال عمرك
صرنا نخاف·
mosfer@taleea.com |
|
طباعة |
|
|
|
