|
|
|
|
مسفر الدوسري
أحب الأرض
وأحب أغصان مغروسة
في صدر الأرض
طالت··ترتفع لي فوق
تلامس وجنة الغيمة
تنثر بذرة الآمال
طول وعرض
وأحب الأرض·
أحب الأرض··
وأحب أغصان مغروسة··
تحت الأرض
تغزل نور ··من الظلمة
ومن عمر الجفاف·· أمطار
وتغيّر في شكل الكف··
خط الحظ··
وأحب الأرض·
أحب الأرض··
عشان حلمي ابتدا منها
وشوقي ينتهي فيها
عشان آنا·· غصن أخضر
يموت لو فارق التربة
يعيش من ماي أغانيها
عشان اجروحي لو زادت··
"بالهولو" ··"واليامال"··
"والمجرور"···· أداويها
أحب الأرض··
عشان آنا··غيمة حب
أعصر قلبي وارويها
وأحب الأرض·
أحب فيها··
قساوتها··
وطيبتها··
وحزن الناس··
وفرحتها
أحب فيها الدفا والبرد
وضحك الشوك
وحزن الورد
أحب فيها محبتها
أحبها حب
أكبر من مساحتها
أكبر من هوى الدنيا
أكبر من ظما الأشجار··
في واحتها
وأحب الأرض·
|
|
طباعة |
|
|
|
