ذبحني الشوق وأنا توني ما حبيت··
عيل اشلون إذا حبيت··
شيسوي الشوق؟!
يذبحني؟!
صلاح الساير
شيسوي الشوق··؟!
غير إنّه يرد الروح
يشرِّع في السما بيبان
يخلّيني أحب الناس··
أحب الليل··
أحب الدفتر الوردي واحب "درويش" (1)
وأحب الدان محضاري
ويخدِّرني شبه حالم
إذا مرَّتْ على سمعي
غناوي بو بكر سالم··
***
شيسوي الشوق··؟ يفضحني؟!
ونا مثْل الشموس الدايره في الكون··
ومثل الآه في صدر اليتيم المنهضم·· مكسورْ
بعد ثاني ضحاوي العيد
لازم تنفجر وتبوح·
في عيني حچي مفهومْ··
في قلبي حمامه تنوح·
أنا مفضوح
خل الشوق يفضحني!!
"إهو السر الوحيد اللي··"(2)
إهو الجرح الكريم اللي تمنيته يصير جروح!
***
تسامى في الهوى بوصلوح
وخل الروح··
مثِل مركب يسلِّم دفته للريح
ما يدري لوين يروح!!
_________________________
(1) الشاعر محمود درويش
(2) العبارة الشعرية لصلاح الساير
وضّاح
wadhah213@hotmail.com
