يا سمو الحلمْ·· يا قطْر السحابه

يا فجرْ مذبوحْ·· يالورد الحزين

بيني وبينك نسبْ واصْلْ وقرابه

بالشعر·· بالهّم·· بالشوق اللعين

فيك طبع الذيب لا استاحش بغابه

وفيك طيب القُمري لا غرّد حنين

وفيك ثلج المغترب·· لا صك بابه

منعزلْ·· مخلصْ·· على همّه أمين

وفيك راهبْ فتّح عيون الغَرابه

وما مسح بيده خطايا التايبين

لا تعجّب من ولد عاشق سرابه

چن عين الماي ناصب له كمين

أو ولدْ باني بلدْ بأرضْ الكتابه

ما طلب دَينه ولا مطلوب دَين

فيه ذل من الهوى·· ويرسم مهابه

وفيه ضعفْ وفيه عزْمْ وفيه لين

محتشد، مزحوم، في صدره خرابه

أو مواقد من قبايل نازحين

ü ü ü

صاحبي·· شوف المطر صافي شرابه

شربته صارت علينا: فرضْ عين

ما يهم البرق لو كشّر بنابه

والرعد لو زاد في حقده الدفين

والعيون اللي لها شهوة ذيابه

ترصد الخطوات من حينٍ لحين

لا تلفَّتْ·· كل خناجرهم تشابه

يطعنونك من يسارْ ومن يمين

دام قلبك شايلْ الورده زهابه

ويّا ديره·· وستْ قصايد من سنين

وضاح

 wadhah@taleea.com