أنت القصيدة

المسا·· جنّي بكفّي أَلْمسه

وَاحْضن نجومه إذا أقبل سناك

والصباح اللي بضحكاتك رسى

إعْلَمْ انه يغار لاضمّك مساك

والظنون اللي بصدري موسوسه

تحسن النيّات لا مَرْها شذاك

هو زعل بالجَدْ·· وقليبك جسى؟!

والاّ يعني تختبر فيني غلاك؟!

ان بغيت الصج·· محبوبك نسى

الزعل واصْل الزعل·· هذا·· وذاك

ما يصدِّق لا ذْكَرَوا "كيد النسا"

الرجال تْكيد أكثر يا ملاك

والقصيد اللي من النور احتسى

وسيَّر بموكب يماري في بهاك··

مثل من يجلب تموره للحسا

وسوقها مليان بعثوقه هناك!

يا قصيده نوّرتْ وجه المسا

حرفها من نور·· مَطْلعها شْفاك

منهو لَمّ الورد كلّه واغْرس

من أعالي غرتك·· لى منتهاك؟!

وضاح

wadhah@taleea.com