وَلا تْصالحْ··

أبد يا خوي لا تْصالحْ··

ولو صبوا بـ يدينك كوثر الأعذار··

لو قالوا: تعال وخلّنا أخوان

نِتْناسى الذي قد صار··

(ما يدرون··

لو تنْشف جروح أجسادنا وتْطيب··

تبقى الأرض·· مبذور الغضب فيها

وخناجرهم بعتْمة ليل·· من يامن بلاويها؟

ومن يمْسح على متن ““الصفاة” اللي چِوَتْها شموس

يداوينا ويداويها؟!

ويمحي همّنا المغروس)

ثرانا اللي بْعدد رمله تهب اجروح

تعال وشوف

لاوين انغرس فينا

وبنى له بيت

يتْسمع خطاوينا··

وغناوي شوقنا المبحوح

وحْدوده!! : شمال القلب

واطْرافه: جنوب الروحْ

··· إيهِ أقصد ثرى الكويت

ثرى الكويت ما ينسى الحبايب في سجن بغداد!

لو حاكم “قبر” بغداد

يِغيِّر حالته “حاله”··

يِبدّل فكره البالي··

يناور في خطاباته··

يجدّد في سياساته وكل ليله من أشكاله!

ولكن يبقى في باله

ثرى الكويت ما ينسى حبايب في····

ومن ينسى الحبايب عاد!

لالتموا حوالينه

تجمّعهم له الذكرى وليالي الشوق

يحب هذا··

ويعز هذا··

وغلا هذا الصغير اللي تعلا فوق··

ويحْلف كلْهم اعياله

هواه وقرة اعيونه وهوى باله··

·····

فلا تنسى

ولا تْصالح··!

ولا تْصالح

ولو حطوا شموس الكون جدّامك

وبالچذب ارسموا أقمار

ولو شفت الفرات (اللي شكى همّه، ونفض دمّه)

وقالوا: مرّنا بمسيار

تراه ايدور لا دار الزمن امرار

ويرجع مايهم مالح

فلا تْصالح··

إذا قالوا: نرد “أخوان”

لا تْصدِّق حچي من خان

ولا لك في الوعد صالح

وإذا دقوا وتر حسّاس بقليبك

ونادوا نبعك وطيبك

يـ “ىوسف” لا تْبَرّيهم

ولا تبرّى خناجر حلِّلَتْ دمّك

وتِتْهَمْ·· بالغدر “ذيبك”!

ولا تْصالح··!

وضّـــــاح

wadhah@taleea.com