لعب الحكومة على الدستور             مثل المغني على طاره

ساعات يرنع بدون شعور                  يستنزل الجن في زاره

وساعات يهدا.. لا شق النور             خايف تكشف لنا اسراره

شلي نووا لج بهالديجور                   ياوردة الروح.. يا سارة؟!

نيات تلمع على الساطور                 تقطف ربيعج مع أزهاره

وخيول شرهم تنط السور                 تاتيج غارة ورا غارة

الناس نامت خلت هالدور                والجار فاقد وفا جاره

محد تطوع برفع الجور                      عنك.. اذا يوم محتاره

يا طيب ذكره "أبو الدستور"               زين جبينج من أفكاره

بدستور صافي كما البلور                 وإلا قمر لم سماره

زاهي بصدرج يـ بنت الحور                عقدج إذا شع بأنواره

واللي تجرا.. يزيد سطور                  شلت يمينه مع يساره

واللي تهاون مهو معذور                   واللي تآمر على داره

واللي يفكر اهو مستور                   شمس الضحى تكشف اخباره!

يا للي تبينا بشهادة زور                  مثل الفداوي.. طفت ناره

إنظر شعيبك ترى ممطور                 لا تآمن اسيول غداره

باجر يعود عليك الــــــدور                 لا تتبع النفس.. أماره..!!

                     وضاح wadhah@taleea.com