· انتقدوني: شلون تكتب أنت في “الوطن” وهذي جريدة سراق المال العام؟
· اليوم سراق المال العام يبون يضربون يوسف الإبراهيم واحنا نبي ننحره هني على المنصة
في الجلسة التي فاجأ فيها القلاف كل من شاهدها، أفاض في تفنيده لجميع محاور الاستجواب·
وهذا نص ما قاله عن أحد تلك المحاور:
الشق الثاني اللي هو أخطر بكثير من كل ما قيل أخطر بكثير، من مستفيد؟ من هو المستفيد من هذا الاستجواب؟ المستفيد الحقيقي من وراء هذا الاستجواب جهتين، الجهة الأولى اللي اشتغلت على يوسف الإبراهيم ليل نهار بأنه حرامي بأنه فلان الفلان والسبب إن يوسف الإبراهيم تعين الشهر الأول، الثاني حول أحد الوزراء الى محكمة الوزراء ليش يسويها جذيه؟ علشان يسوي جذيه لازم نحرقه ونعطي درس عبرة لكل وزير في مجلس الوزراء يتجرأ راح أحرقك مثل ما حرقت يوسف الإبراهيم هذي الحقيقة اللي لازم نشوفها للأسف الشديد ماكو، ماكو العين علت لأن خلاص أنا بس باروح حق يوسف الإبراهيم تنحرق الكويت تندمر ما لي شغل المهم أنا أروح واللي فيها، فيها، هذي الحقيقة والا شاكو الوطن؟ صبح، ليل، عصر دق على هالرّيال، متى كان السعدون اسم يكتب في جريدة “الوطن”؟ واّلا عدنان عبدالصمد اسم يكتب في جريدة “الوطن”؟ واّلا تحط صورتهم هذيله الاثنين المخربين يصبحون نجوم بجريدة “الوطن”؟ ليش؟ ليش؟ مو هذا يخليني أنا أقف أفكر يا جماعة أنا أعرف الوطن، أنا كتبت مجموعة مقالات انتقدوني اشلون تكتب أنت بالوطن وهذي جريدة سراق المال العام؟ جذيه قالوا لي، هذا قالوا لي هالكلام، اشلون تكتب مقالة؟ طيب هذا إذا يخليك أنت تشير علي بالاتهام اشلون ما يخليك توقف هالهجوم الشرس على يوسف الإبراهيم؟ ما يخليك أنت كسياسي محنك تفهم، تقدر الأمور؟ تقول ليش يوسف الإبراهيم الشهر الثاني هو والصبيح يذكره الله بكل خير حولوا الوزير الى هذا ما تخليك توقف؟ بالله عليك ووين هذي الفطانة؟ ووين هذا؟ وين هذي؟ سراق المال العام لأنهم قاعد يهجمون سراق المال العام، يوسف الإبراهيم كان ضمن اللجنة اللي راحت سيد عدنان وربعه يبحثون عن سراق المال العام وهو مستشار يبحث عن سراق المال، اليوم سراق المال العام يضربون يوسف الإبراهيم وإحنا نبي ننحره اهنيه على المنصة هذي، عدل؟ هذي تبونها لكم؟
