حسبي على اللي فطّروا مسلمٍ صام

            قبل المغَرْب شوي·· خرّب صيامه··

بين الحكومه وبين مجموعة أقوام

            ضيّع تعب يومه بسبة كلامه

اللي يشوف بظلّهم ذبح وإعدام

            في عز صحواته ولذة منامه

لين انجبر يسحب كما سِلْك نظّام

            ومن الخَرَز رتَّب معاني نظامه

هذا واهو حالف اذا طيرهم حام

            في ها الشهر يطوي بقايا اسهامه

لكنّه شاف القاع مزروعه الغام

            ولا سِمَعْ احدن بدا فـ الملامه!

چن البلد مسكونه اشباحْ واصنام

            لا صوتْ يسمَع وسْط دُور الهدامه

من يوم حظ “الطالباني” بعد قام

            وهذي الحكومة بالغت باحترامه

ما چن أَهَلْنا ودارنا دار اسلام

            جتنا تعلّمنا طيور الندامة!!

“حد الشريعة” وين عن “مالنا العام”؟!

            يا دافنينٍ روسكم كالنعامه؟!

مر للحرامي عام أو مرتْ اعوام

            ندري الحكومة ما نوّت باتهامه؟

***

جاوزت في شهر الفضايل ولا نْلام

            حيثي اشوف ابْكل مفرق علامه

ونا وحكومتنا انْتجازى بالآثام

            متناصفين الذنب يوم القيامه!!

وضّـــــاح

wadhah@taleea.com