على سابع وتر بالقلب··

رفّ البارحه حلمي··

نغم ما بين نجماتك

تسامرني·· واسامرها

تواسيني·· وواسيها

وقرينا من الكتاب اللي

كتبته عن مسيرة شوق

ملينا اعيوننا فرحة·· وتعلّينا بفخر لى فوق

وعلى آخر سطر ضاوي بنهاية فصلك السادس

تفاجأنا··

بنقطهْ من الحبر سودا

بكت بعيون صفحاتكْ··

************

تحرينا تمر في ليل

وعزّمنا إذا اتْعذَّرتْ ما نقْبل أبد منّك

إذا كان العذر·· تعليل!

وما دام اللقا·· لحظة من الأعمار مسروقه

نبي نطوّل سوالفنا

إذا ذاك الحزن·· لفنا

وإذا وقته - على عكس الطبع يمشي - ويخالفنا

نبي انعطّر ثياب الليل

من طيب انحبس شوقه·· بصلابة عود

ومن قلبٍ كتم آهات محروقه·· بصهيل الخيل

أنا ونْجوم سهرانه·· ونسايم ليل

تحرينا··

تحرينا··

ودقّت ساعة الآلام·· بغيابك

ولا شفنا انفتح لك باب·· لحبابك

تقفّل وقت حزّاتك!

أفا·· يا بو الوفا والطيب

تغيّر ليش عاداتك!

************

أنا الغلطان

حسبت ان العمر يَمْدي

على مرّ الزمن وافي

ولا أدري·· فـ يوم يروح

وأجّلنا سوالفنا

وأجّلنا مواسمنا

وأجّلنا الكلام اللي··

على امتون الزمن غافي·· وبعد قلنا:

سنه ونبوح

جهلنا ما درينا الناي واطباعه

إذا طال المدى بعمره

يرد بغنوته مبحوح

وطال البارحه حلمي

سرت بالروح همساتك

تراوالي خيال ابعيد

عرفت البارحه ظلك

تبعت اغيوم خطواتك

وردَّتْني عن ادروبك

كواكب في يد الأقدار

تتْعلى افـ  سماواتك

تبعتك··

ما يهم شتقول؟!

بَتْأمّل محطاتك!

زمان تقول: لا صار الزمن اعصار

برد وريح

فلا أرضى على ها الدار

يسهّر عينها تجريح

وزمان تقول: لا ثار الغضب كالنار

سموم وقيظ

أمطر كالمزن هدّار

لمّا يفيض

مو قلت: الهوى للدار

يـ اهل الدار

ثِبْتوا بالهوا لا دار

توصينا·· وفجأة تغيب

آفا·· يا بو الوفا والطيب

بدون اموادع أحبابك·· نويت اسفار··

*************

يـ زارع في عيون الناس

آمال ووطن واحلام

ما تنطر مواسمها؟!

عجيبه·· وأنتَ راسمها··

مو قلت: الأمل چدام!

يـ زاهد في محاصيله

نعم·· ما للأجل حيله

نعم·· يا بو الوفا والطيب

نثرت الطيب·· لحبابك

على أغلى ثرى وتغيب··

نظيف الجيب

مثل ما كنت بحضورك

مثل ما صرت بغيابك

وخلّيت الوطن واقف حدر شمسك

تماسك·· مره ومرتين··

لكن من سمع همسك

بكى يم عتبة بابك··

Wadhah97@hotmail.com

وضاح