"نَبَط" مدفون في رَمْلِج·· نسوه اجدادنا "الأنباط"

                        زرعته في ثرى روحي نَخَلْ·· من يوم انا اخطّي

حفظت امن الهوا عذقه·· فرشت القلب له ابساط

                        سقيته في سموم القيظ عَذْب الفيض من شطّي

وهزيت الجذع بيدي·· تساقط فـ العيون "احباط"!!

                        زعلت وقلت: يا ريحي لكل احْمولها قِطّي

انا اللي مخيّط اشموسي عن عيونج بدون اخياط

                  وإذا مرّتْ بج الغيمه اقول بخيرها اتْبَطّي

نقشت بجذعج الناشف هوى ما ينقشه خطّاط

                  حلفت انّج تحفظينه لجل ما ينْمحي خَطّي

نسيتي عاشقٍ عيّا يدنّي مهرته لرباط

                  قطع حبل الرسن خايف لغيرج مهرته اتْوَطّي

حسافه·· نَخْلة الوادي·· تجازيني بدون اغلاط

                  أجل·· يا ريح·· لا طِرْتي على ذاك السعف حِطّي

وقولي: كل وعايدهم سوالف ما لها ربّاط

                  بكلمات العتب مني·· على وجه الثرى خِطّي:

"قلُمة" ماي "ولآلئهم"·· دَجَل·· ندري الدجل انماط

                  جذب مكشوف للدنيا·· عقب ما كان متْغَطّي!!

وضّـاح

wadhah@taleea.com