(1)

قطره

قطرتين··· وبردْ

وفجر اتهب نسماته

وتتحدر دموع الوردْ

ونا وانتِ·· ودفا الأنفاس

ورابعنا الطريق اللي غسل قلبه

وتوضّا عن خطايا الناس

أنا اتْدّفا بسنا إيدچ

وعلى جمرة غضى قلبي - بلحظة شوق -

تتْدفينْ···

وفتحْنا في السما بابين!

(2)

قطره

قطرتين·· وناسْ

على غفله - صَحَتْ عين الطريق اللي

اخطفت نومه خطاوي الناسْ

وقلتي لي: المطر في زود!

وعيون البشر حرّاس

يـ ليت الباب··· في وجه السما مردود

يـ ليتك ما فتحت الباب!

وقلتي لي:

"عباتي خلّها ليْ فوقْ

لجل ما ينطفي شوقك،

ولا يهدا بصدري شوقْ"

وشكيتي لي من أطباع الهوا الفضّاح

ولا تدرين

يـ نور العين

عادات الهوا·· فضّاح

إذا وقّف على البيبان

همس كلمة غزل وعْتاب··· بإذن الباب

يمر وهمسته·· مفتاحْ

وكل ليلْ انطفى شوقه

وكل قلب انطوى سره·· بعد بيـ بان!

وما تدرين!

شيسوي الغصن مسكين!؟

إذا مر الهوا مرّه

عصى جذعه·· وتنغّص له

وعطاه امن الثمر تفاح

ولو يبقى مدى عمره··· غصن عاري بدون ثياب

ولو تدرين

في آخر خريفٍ مَرْ·· شكوا من ظلمه الجيران

ولي جاره (وحيده امن الخيال اتخافْ)

تسوِّر حلمها الشفاف·· عن النجماتْ

ستايرها ومراياها·· تخبِّّيها عن النسماتْ

شكت لي من الهوا قالت:

"عنيفْ، وطايشْ، ومغرور

ولا تردّه درايشْ عاليه أو سور

أنا دوبي أخاف النار

واتحاشا زوايا النور

زرعت بغرفتي ورده ·· تفتّح كل مباهجها

بمخدّه امبلله، وعتماتْ

تصوّر·· بس وصل يمي بجنح الليل

بدا غدره

ملا صدره

نفخ في قلبي·· الآهاتْ

وساومني على الورده

نثر أوراقها الصفرا على الجيرانْ

ومن باچر··

قروا أيامي وعمري

قروا أحلامي وسرّي·· على الساحاتْ!

وفي آخر مشاويره

قعد فوق اعْتبة داري·· وطفى المصباحْ"

* * *

تنهدتي ·· تحسرتي

بغيتي من الألم تشكين

وقبل ما تبرد انفاسچ

مسحتْ إيدي على الثنتين:

غيمه بالسما مرت

وغيمه حايره بالعين!

(3)

قطره

قطرتين·· وليلْ

ونبَّهنا - بغفوتنا -

جرس ضاوي بكف اسهيلْ

مطر نازلْ

هوا عالي

وليل وبردْ

ولهينا في سوالفنا

نسينا ما بنينا السدْ·· بوجه السيلْ!

وعلى ذاك الطريق اللي····

······ ········

محينا كل ملامحنا - غصب عنّا - من الأمطار

وسكَّرنا عيونٍ حالمه فيها:

            درايش عاليه···· وبابينْ!!

وضّاح

wadhah@taleea.com